Син дә мулла, мин дә мулла, интернетта кем була?

Заманасы шундый, дин дә бер урында тормый! Мулла кирәксә, күңелгә хуш килгәнен iMulla аша сайлап алырга була. Әллә белмисезме? Хәзер сөйлибез! 

Күптән түгел генә барлыкка килде бу сервис. Интернетка кереп, һәр теләгән кеше үз шәһәрендә яшәүче муллаларны табып, алар белән элемтәгә керә, чарага, яки берәр йолага чакыра ала. 

Проект авторлары әйтүенчә, бу сайтның төп максаты — дини хезмәтләр күрсәтүне җиңеләйтү һәм халык арасында мәгърифәтчелек эшчәнлеге алып бару. Дин тотучыларның мөмкинлекләрен киңәйтү һәм шул рәвешле кешеләрне Русия өчен традицион ислам диненә җәлеп итү. 

Сайтта теркәлгән муллаларны төрле йолаларга, чараларга чакырыр өчен зур булмаган анкета тутырырга кирәк. Монда киләчәк мулланың яшен, милләтен, эш тәҗрибәсен һәм җенесен (тик сайтта бер генә хатын-кыз мулла да юк) сайлап алып була. Шулай ук сайтта теркәлгән муллаларның рейтинглары, ничә чарага чакырулы булулары турында да мәгълүмат бар.

Проектны Ринат хәзрәт Аляутдинов җитәкли икән.