"Сәләт" сәләтлеләрне эзли

«Сәләт» оешмасы һәр ел саен Флүс Латыйфи исемендәге IX «Сәләткә нур булган йолдызлар» бәйгесен уздыра. Быел ул тугызынчы мәртәбә үткәреләчәк. Бу гади генә бәйге түгел, ә иҗади лаборатория дә, чөнки монда катнашучыларның әсәрен анализлыйлар, һәм алга таба ничек иҗат итәсенә юнәлеш һәм киңәшләр дә бирәләр.

Конкурста 11 яшьтән алып, 22 яшькәчә иҗат итүчеләр җәлеп ителә. Каләм тибрәтүче яшьләр шигърият, чәчмә әсәр, драматургия, балалар әдәбияты һәм публицистика номинацияләрендә катнаша ала. Иҗади көчне берничә номинациядә сынап карарга да була. Финалга узган иҗатчылар «Сәләт йорты»на чакыру алачак. Әсәрләр жюри әгъзалары тарафыннан бәяләнә. Җиңүчеләрне дипломнар һәм бүләкләр көтә.

Катнашу өчен selet.biz сайтында гариза калдырырга кирәк. Гариза җибәргәч, эшләрне selet.nur@gmail.com адресына 1 апрельгә кадәр юлларга кирәк. Әсәрләрне Татарстан Язучылар берлеге әгъзалары, шагыйрьләр, язучылар, журналистлар тикшерәчәк.

Фотолар vk.com/selet.official сайтыннан алынды.