Солы кесәлен ничек пешерергә? (Иң җиңел рецепт)

Санаторийда эшләгәндә шикәр авыруы белән авыручылар өчен зур кәстрүлләрдә солы кесәле пешерәләр иде. Шул кесәлне бер генә эчеп караган булды. Аннан кайдан гына эзләсәм дә таба алмадым. Интернетта караган рецеплар озак һәм катлаулы булып тоелды. Быел кибет киштәләрендә "сөт булмаган" сөт барлыкка килде (ул солы оны һәм рапс дигән үсемлек маеннан ясалган). Тәме шул санаторийда эчкән солы кесәлен хәтерләтә. Искә төшкәч, яңадан пешереп карыйсы килде. 

100 грамм солыны (геркулесны) кофеугычта кырдым да, 1 литр су салып төнгә калдырдым (6 сәгатьтән дә ким тотмаска). Иртән яхшылап болгатып вак иләктән сыктым, тагын солы массасын су белән чайкаттым. Солы ярмасы калдыкларын биткә маска ясау өчен кулланырга була. Әкрен генә утка куеп кайнаганчы тоттым (болгатып торырга кирәк). Тоз һәм бераз ваниль оны салдым.Теләгәндә сөт яки кибеттә сатыла торган теге сөт булмаган сөтне дә салып булыр иде. Май салып ашаучылар да бар. 

Солы кесәле тәмле дә бик файдалы да ул. Организмдагы зарарлы матдәләрдән чистарта, матдәләр алмашын, иммунитетны яхшырта, органнардагы ташларны эретә, кандагы холестеринны киметә һ.б.