СТУДЕНТЛАР – СТУДЕНТЛАРГА

“LIGA FORUM” белем бирү форумына гаризалар бирү кампаниясе старт алды. Студентлар өчен “ТР Студентлар лигасы” оештыра торган форум быел җиденче мәртәбә Биләр тыюлыгы территориясендә узачак. Быел ул өч сменада 15 августтан алып 31 августка кадәр дәвам итәчәк. 

Беренче смена (15-19 август) “PROFESSIONAL” исемен йөртә: ул һөнәри белем бирү оешмалары студентлары өчен каралган, икенче “UNIVERSITIES” (21-25 август) сменасы, исеменнән күренгәнчә, югары уку йортлары студентларын берләштерәчәк. Өченче смена (27-31 август) исә ике категориягә дә караган студентлар берләшмәләрен көтә. Форумда барлыгы ике меңнән студент кайнаячак. 

“LIGA FORUM”да катнашучыларның күбесе Татарстан Республикасыннан булыр дип көтелсә дә, форум эшенә башка регионнарда укучы студентларны да чакыралар. Былтыр, мисал өчен, форумда Россиянең 39 регионыннан килгән яшьләр катнашкан.

Студентларга бик эчтәлекле, актив эшчәнлеккә басым ясалган программа әзерләнгән: фән өлкәсендә кыю адымнар ясау яшьләр дә, проектлар өлкәсендә эш алып баручылар да, спорт белән шөгыльләнүчеләр, медиа өлкәсендә кайнаучылар һ.б. – барысы да үзенә кызыклы трек – юнәлешне табачак, дип белгертте “ТР Студентлар лигасы”.

“ТР Студентлар лигасы”ның башка масштаблы проектларына килгәндә, 16 майдан алып 13 июньгә кадәр Татарстан студентларының икенче съезды серияләре оештырылыр дип көтелә. Быел алар Татарстанның җиде шәһәрендә – Яр Чаллы, Әлмәт, Алабуга, Түбән Кама, Бөгелмә, Яшел Үзән, Лениногорск шәһәрләрендә узачак. Алар нәтиҗәсендә студентлар дөньясының актуаль мәсьләләре турында фикер алышу планлаштырыла, шулай ук студентлар берләшмәләренең шәһәрләрдәге вәкилләре сайланачак. 

“Бу проектлар студентлар тарафыннан студентлар өчен эшләнелә. Нәкъ менә шундый синтез вакытында гына тыгыз элемтәләр корыла, очкын һәм чараларда үзенә күрә бер романтика барлыкка килә”, – ди “ТР Студентлар лигасы” президенты Руфат Кыямов.