Татар киносы Казахстанда 15нче «Ауразия» Халыкара кинофестивалендә күрсәтелә

2 һәм 5 июльдә Казахстан башкаласы Нур-Солтанда Татарстан киносы көннәре үткәрелә. Әлеге чара 2019 елның 6 июленә кадәр уза торган «Ауразия» 15нче Халыкара кинофестивале кысаларында үткәрелә. Тамашачыларга «Инсаф» (реж. Ф. Дәүләтшин), «Остазбикә» (реж. Р. Кәримов-Сайга), «Хәлимә» (реж. Ю. Захарова), «Ата нигезе» (реж. Ә. Галиәскәров, Н.Юрушбаев).
Татарстан фильмнары конкурс һәм конкурстан тыш программа үткәрелә торган «Ауразия»  Chaplin Khan Shatyr («Хан Шатыр») кинотеатрында күрсәтелә.

Кинофорум көннәрендә шулай ук Халыкара кинопроектлар питчингы үткәрелә, анда Г. Ибраһимов әсәре буенча «Алмачуар» фильмы проекты тәкъдим ителә. Әлеге проектны режиссер Илшат Рәхимбай һәм продюсер Миләүшә Айтуганова тәкъдим итә. «Татаркино» директоры шулай ук кинофестивальгә кыска метражлы фильмнар секциясенең жюри әгъзасы буларак та чакырылган.

«Ауразия» кинофестиваленең конкурс программасына Кытай, Франция, Русия, Македония, Италия, Филиппин, Израиль, Украина, Австралия һәм башка илләрдән кинокартиналар катнаша. 
Халыкара фестиваль көннәрендә Казахстанның Милли кинога дәүләт ярдәме үзәге идарәсе рәисе Андрей Хазбулатов һәм «Татаркино» директоры Миләүшә Айтуганова  хезмәттәшлек турында меморандум имзалады. 

Исегезгә төшереп үтик, «Ауразия» кинофестивалендә тәкъдим ителгән «Инсаф» фильмы 21-23 июньдә Казанда узган  II Халыкара 
Төрки кино фестивалендә дә күрсәтелде.  Әлеге фестивальдә 7 төрки илнең кинематографисты катнашты, фильмнарны ике меңнән артык тамашачы карады.