Татар тарихы – архивта

Үткәннәрдән бихәбәр кешегә дә төп-төгәл мәгълүмат ирештерергә сәләтле ул архив диварлары! Эзлән, кара, мөрәҗәгать ит – тарих дәреслекләрендә язылмаган әллә ни чаклы фактларга юлыгырсың! 
Бүген Татарстан Президенты Рөстәм Миңнеханов та республиканың Архив эше буенча Дәүләт комитеты коллегиясенең киңәйтелгән утырышында катнашты. Чарага барлыгы меңнән артык кеше чакырулы иде. Коллегиянең төп темасы - ТАССРның 100 еллыгын бәйрәм итүгә әзерлек. Катнашучылар фикер алышулар башланганчы уникаль экспонатлар һәм архив документлары күргәзмәсе белән танышты. Коллегия трансляциясе Татарстан Республикасының рәсми порталында алып барылды. 
2018 елда Русия Президенты Владимир Путин «Татарстан Республикасы төзелүнең 100 еллыгын бәйрәм итү турында»гы Указга кул куйган иде. Татарстан Президенты Рөстәм Миңнеханов Указы белән 2020 ел республикада Татарстан АССР төзелүнең 100 еллыгы елы дип игълан ителде.