Татарстан агачы өчен тавыш бир!

Интернетта нинди генә тавыш бирүләр юк! Мәсәлән... агач өчен кызыклы гына тавыш бирүдә катнашып, Татарстан имиджын күтәрүгә һәркем үзеннән бәләкәй генә өлеш кертергә мөмкин.

1 майдан http://rosdrevo.ru/russian-tree-of-the-year сайтында "Илнең төп агачы – елның Россия агачы" илкүләм конкурсы буенча тавыш бирү башланды. Номинантлар арасында Татарстан, Чечня, Ленинград өлкәсе, Удмуртия, Төньяк Осетия-Алания, Калмыкия, Иркутск, Псков, Ростов һәм Иваново өлкәләреннән, Тамбов һәм Мәскәү шәһәренең Тверской бульварыннан 12 агач бар.

Татарстан Республикасыннан себер чыршысы (Picea obovata Ledeb.) катнаша. Ул төбәк әһәмиятендәге "Долгая Поляна" (Тәтеш районы)  комплекслы профильле дәүләт табигать тыюлыгы территориясендә урнашкан. Бу агач 2012 елда "Агач – тере табигать һәйкәле" русиякүләм әһәмиятендәге статуска ия булган. Чыршының яше – 132 ел, биеклеге – 32 метрдан артык, ботаклары җиргә тиеп үскән, диаметры 8 метрга җитә. Чыршы ялгызы гына ачыклыкта – элекке дворян Молоствовлар утарында үсә. Аның яныннан Идел киңлекләре һәм борынгы Болгарга мәһабәт күренеш ачыла. Хәзерге вакытта утар – Тәтеш туган якны өйрәнү музее филиалы, һәм монда туристлар күпләп килә.

Тавыш бирү 1 майдан 1 октябрьгә кадәр дәвам итә. Җиңүче дип табылган агач Русия Федерациясе исеменнән “Аурупаның ел агачы” конкурсында катнашачак, ә бүләккә агачны 1 ел буе ETW белгечләре карап, хезмәт күрсәтүгә Сертификат биреләчәк. Моннан тыш, агач урнашкан Русия субъектының башкарма хакимияте вәкиленә "Елның Русия агачы" дигән истәлек тактасы тапшырылачак.