Татарстан хайваннарсыз эшләүче циркка күчкән беренче төбәк булырга мөмкин

Әгерҗе депутаты Марсель Шахмин Татарстанда хайваннар катнашындагы циркларны тыярга тәкъдим иткән. 

"Хәзер хайваннар катнашындагы циркларны тыю турында җәмгыятьтә фикер алышулар бара. Андый циркларны аерым республика, төбәк эчендә тыю мөмкинлеген карарга кирәк", – дип сөйләгән ул "Татарстан – Яңа гасыр" республика иҗтимагый хәрәкәте Югары советы утырышындагы чыгышында.

Татарстан мондый карар кабул иткән Россиядәге беренче төбәк булырга мөмкин.

"Яшьләр миннән Татарстан Дәүләт Советы Рәисе Фәрит Мөхәммәтшин һәм депутатлар алдында тәкъдимебезне яңгыратырга сорады", – дип мөрәҗәгать иткән ул утырышта катнашучыларга.

Депутат сүзләренчә, районнарда яшәүче кешеләр экологияне һәм хайваннарны яклау мәсьәләләренә битараф түгел, күпләр бу тәкъдимне хуплар дип көтелә.

Ә сез циркта хайваннар куллануга ничек карыйсыз?

фото: Татьяна ПОДЪЯБЛОНСКАЯ

Чыганак :tatar-inform.tatar