Татарстанда 15 апрельгә кадәр махсус режим керде

Коронавирусның таралуына каршы көрәшә торган республика штабы Татарстан Президенты Рөстәм Миңнеханов кушуы буенча республикада 15 апрельгә кадәр махсус санитария-эпидемиология режимы кертте. Бу хакта ТР Президентының матбугат хезмәте җитәкчесе Лилия Галимова хәбәр итте.

«Халыкара спорт чаралары санитар-эпидемиологик вәзгыять әйбәтләнгәнче кичектерелде, спорт матчлары тамашачылардан башка гына үткәреләчәк, мәдәни чаралар да соңрак үткәреләчәк. Планлаштырылган гастроль концертлары оештыручылар куркынычсызлыкны тәэмин итү өчен барлык таләпләрне катгый үтәгән һәм тамашачыларның сәламәтлеге өчен шәхсән җавап биргән очракта гына узачак», - диде Галимова.

Моннан тыш, ТР Президенты тарафыннан дәүләт хакимияте органнары вәкилләренең чит илгә барлык командировкаларын кичектерү турында карар кабул ителде. Республика предприятиеләре җитәкчеләре, барлык эш бирүчеләргә дә шундый киңәш бирелде.

Коронавирусның таралуына каршы көрәш буенча республика штабы вәкилләре инфекция очраклары теркәлгән илләрдән кайткан кешеләргә бу хакта Роспотребнадзор хезмәткәрләренә хәбәр итәргә куша. Үзегездә хәлсезлек тойсагыз, табибка киңәш сорап мөрәҗәгать итәргә кирәк.

Моннан тыш, гигиена таләпләренә дә җиңел карамска кирәк: көн дәвамында кулны юып торырга, һәркөнне душ керергә яки чәйканып чыгарга, эштә һәм өйдә бүлмәләрне җилләтергә, кеше күп булган урыннарда һәм автобусларда маска киеп йөрергә киңәш ителә.