Татарстанда атна ахырына кадәр уртача салкын һава торышы саклана

15 нче мартта Татарстан буенча аязучан болытлы һава көтелә. Бераз кар явачак, көндез урыны белән аерым районнарда буран фаразлана. Җил – көнчыгыштан, төньяк-көнчыгыштан. Төнлә һаваның минималь температурасы -9 дан -14 градуска кадәр, аязган вакытта -19 градуска кадәр булачак. Көндез максималь һава температурасы -5-10 градус суык булыр дип фаразлана.

Казанда  шулай ук аязучан болытлы һава көтелә. Сишәмбе төнендә бераз кар көтелә, аерым районнарда буран булачак. Җил – көнчыгыштан, төньяк-көнчыгыштан. Төнлә һава температурасы -10-12 градус, көндез -5-7 градус суык булачак. Юлларда бозлавык саклана, дип хәбәр ителә ТР Гидрометеорология һәм әйләнә-тирә мохитне күзәтү идарәсе сайтында.

16 нчы һәм 17 нче мартта Татарстанда явым-төшем көтелми. Һава температурасы төнлә һәм иртән 13-19 градус салкын, аязган вакытта -24 градуска кадәр булачак. Көндез 3-10 градус салкын булыр дип көтелә.

18 нче мартта һәм 19 нчы мартта Татарстанда төнге температура -13 тән -18 градуска кадәр булачак. Көндез җылыначак – синоптиклар -4 тән +1 градуска кадәр булачак дип җиткерә. Урыны белән бераз кар явачак.