Татарстанда ярты ел эчендә балигъ булмаган яшьләр кылган җинаятьләр саны арткан

Татарстанда балигъ булмаган яшьләр кылган җинаятьләр саны арта бара. Бу хакта туры эфир вакытында Татарстан вице-премьеры Ләйлә Фазлыева сөйләде.

«Ярты ел нәтиҗәләре буенча без Татарстан Республикасында балигъ булмаган яшьләр кылган җинаятьләр санының артуын күрәбез. Бу ачыклау мәсьәләсенә дә, якында булган хәлләр турында кая һәм ничек хәбәр итәргә икәнен халыкка җиткерү мәсьәләсенә дә бәйле», – дип сөйләде ул.

Ләйлә Фазлыева сүзләренчә, исерек хәлдә, җәмәгать урыннарында һәм төркем составында балалар кылган җинаятьләр саны кимегән.

Аның сүзләренчә, еш кына яшүсмерләр җинаятьчелекне романтикалаштыра. Ләйлә Фазлыева балаларының мондый гамәлләренә ата-аналар сабырлык күрсәтмәскә тиеш булуын белдерде.

Чыганак: Татар-информ