Татарстандагы иң кирәкле һөнәр ияләрен атаганнар

Татарстанда иң кирәкле һөнәр ияләре – машина йөртүчеләр, электр-газ белән эретеп ябыштыручы, кондуктор, механик-җыю эшләре слесарьлары.

Шулай ук сәламәтлек саклау өлкәсенә санитарка, шәфкать туташлары җитми. Хезмәт, халыкны эш белән тәэмин итү һәм социаль яклау министры Эльмира Зарипова билгеләп үткәнчә, узган елның катлаулы булуына, күп кенә компанияләрнең Россиядән китүенә карамастан, мәшгульләр саны гына түгел, вакансия буенча тәкъдимнәр дә сакланып калган. Татарстанда мәшгульләр саны Россиядә иң югары күрсәткечләрнең берсе – 62 проценттан артыграк тәшкил итә.

Министр сүзләренә караганда, хәзерге вакытта эшсезлек тә моңарчы күрелмәгән дәрәҗәдә – нибары 0,36% (7,2 мең кеше). 43 мең буш эш урыны бар. Шул ук вакытта Татарстанда яшәүчеләр үзләре йөртүче, менеджер эшләрен ешрак эзли икән. «Моңа кадәр алар башлыча финанс, менеджмент өлкәсендә эшләгән, әмма узган елда бу сектор кысылды. Һичшиксез, инженерлык белгечләре, мәгариф системасы буенча тәкъдимнәр күп», – ди Эльмира Зарипова.

Чыганак: Ватаным Татарстан