Татарстанга Африка чумасы вирусы килеп җитәрме?

Россиянең кайбер төбәкләрендә Африка чумасы вирусы белән зарарланган дуңгыз ите табылган. Бу хакта Interfax агентлыгы  Россельхознадзор идарәсенә сылтама белән хәбәр итте.

Әлеге авырудан дәва әле уйлап табылмаган. Авыруны йоктырган дуңгызларның 100% үлә. Хәер, әлеге авыру кеше өчен куркыныч түгел. Ләкин кеше аша ул башка терлеккә күчәргә мөмкин. Шулай ук авыру катнаш азык аша да күчәргә мөмкин.

 Әлеге вакытта Россиянең 5 ноктасында әлеге авыру белән бәйле карантин игълан иттелгән. Авыруны кыргый шартларда яшәүче кабаннар да тарата. Чума Ульян, Нижгар, Калининград, Новгород, Ростов һ.б. өлкәләрдә табылган. Татарстанга иң якын урын Ульян өлкәсе булып тора. 

Санитар нормалары һәм куелган кагыйдәләрне төгәл үтәгән очракта вирусның Татарстанга эләгүеннән сакланып калып булачак дип аңлатты узган матбугат конференциясендә Татарстан буенча ветеринария идарәсе башлыгы урынбасары Габдулхак Усманович.

Әлеге кагыйдәләр shn.tatarstan сайтында күрсәтелгән.