Татарстанга Таиландтан 115 кеше кайта

Таиландтан Татарстанга кайтучылар 16 апрель көнне туганнары белән күрешә алмаячак. Аларны аэропорттан ук ике атнага “Ливадия” санаториясенә обсерваторга яки Covid-19 билгеләре булса, инфекцион хастаханәгә озатачаклар. Бу хакта республиканың коронавирус таралуга каршы көрәш штабы җитәкчесе, ТР Премьер-министры урынбасары Ләйлә Фазлыева хәбәр итте.

Обсерватор – коронавирус йоктыру куркынычы булган кешеләрне тикшерү урыны.

Таиландтан кайтучылар арасында балалы гаиләләр дә бар.
- Кайберәүләр балалары белән барган. Исемлектә 18 яшькә кадәр 27 кеше. 2018-2019 елларда туган балалар бар, - диде Фазлыева.

Ләйлә Фазлыева әйтүенчә, кайтучылар исемлегендә 115 кеше, ләкин күбрәк булуы да ихтимал. «Бортта Киров өлкәсе гражданнары да бар. Алар да обсерваторга җибәрелә. 115 кешенең 60ы — Казаннан, Чаллыдан — 23, Әгерҗе — 1, Әлмәт — 4, Бөгелмә — 1, Югары Ослан — 4, Алабуга — 1, Зәй — 1, Яшел Үзән — 5, Лаеш — 3, Мамадыш — 1, Түбән Кама — 8, Питрәчтән өч кеше», — диде.