"Театрда импровизация" актерлык лабораториясенә теркәлү бара

Бүген Татмедиа агентлыгында "Театрда импровизация" актерлык лабораториясе проектына багышланган матбугат конференциясе узды. 

«Калеб» яңа буын җыены Г.Кариев исемендәге яшь тамашачы театры белән берлектә «Театрда импровизация» актерлык лабораториясен башлап җибәрде. Лабораториянең максаты – тренинглар аша үз театраль телеңне эзләү, мөмкинлекләреңне ачу. Эзләнүләр имповизацион театраль тамаша белән тәмамланачак. Беренче очрашу 24 февральгә билгеләнгән. 

Лаборатория сайлап алу, мастер-класслар, тренинглар, мөстәкыйль эш, режиссер белән эшләүне үз эченә алган 4 этаптан торачак. Катнашучылар белән Кариев театры хореографы, «Алтын битлек» театраль премиясе лауреаты Нурбәк Батулла, Казан дәүләт яшь тамашачы театрының баш режиссеры Туфан Имаметдинов, хореограф, “Немая рыба” заманча хореография компаниясенә нигез салучы Марсель Нуриев, Россиянең театр һәм кино актёры Андрей Феськов шөгыльләнәчәк. 

Лабораториядә һәр теләгән кешеләр катнаша ала. 

Лабораториядә катнашу өчен 23 февральгә кадәр әлеге сылтама буенча теркәлеп булачак.

24 февральдә «Калеб-ликбез» кысаларында Нурбәк Батулла, Туфан Имаметдинов һәм Марсель Нуриев импровизация театры юнәлешендә мастер-класслар бирәчәк. 

Мастер-класслар "Театрда ипровизация" актерлар лабораториясен ачып җибәрә!