Телләр өйрәнергә... җәй көне дә соң түгел!

Җәй ул - пляжда кызыныр, кайнатма кайнатыр өчен генәме? Юк! - диләр акыллы һәм булдыклы кешеләр. Андыйлар үзләре өчен дөнья ача, файдалы белемнәр ала. Мәсәлән, яңа телләр өйрәнергә керешә. Татар башкаласында да сирәк түгел мондый үзенчәлекле, кызыксынучан затлар. Казан шәһәренең Күпмилләтле якшәмбе мәктәбе инглиз, гарәп, грузин, корея һәм төрек телләрен чит тел буларак өйрәнү буенча курсларга укучылар туплый. Хәзерге вакытта инглиз, гарәп, грузин, корея, төрек телләре төркемнәре туплана. Билгеле, чит телләр өйрәнү бушлай була алмый: өлкән кешеләр өчен бер айлык түләү 900-1000 сум чамасы. Дәресләрнең кайчан үтәчәге төркемнәр җыелып беткәннән соң билгеле булачак, ди оештыручылар. 
Шулай ук студентлар һәм 7 яше тулган балалар Күпмилләтле якшәмбе мәктәбенең түбәндәге бүлекләренә: әфган, әрмән, әзәрбайҗан, бурят,  вьетнам, керәшен, мари, мордва, чуаш, украин, төрек  һ.б. – барлыгы 21 тел буенча – туплана. (Тагын кайсы телләр икәнен һәм башка мәгълүматны 8-908-349-98-82 телефоны буенча шылтыратып, Ләйсән Рәфит кызыннан белешергә була). Якшәмбе мәктәбе курсларына татар телен өйрәнергә дә язылырга мөмкин, дип хәбәр итә Халыклар дуслыгы йорты мәгълүмат үзәге.