Тормыш - үзе көрәш...

Танылган спорт журналисты, "Татарстан яшьләре" газетасының баш мөхәррире, көрәш хөкемдары Атлас Гафиятовның көрәш турында тагын бер китабы дөнья күрде. Чираттагы иҗат җимеше "Тормыш - үзе көрәш" дип атала.

Әлеге китап көрәш дөньясында билгеле шәхес - Россиянең атказанган тренеры, халыкара категорияле хөкемдар, Казан шәһәренең мактаулы гражданины Әсгать Шәйхетдин улы Шәйхетдинов һәм Казан авыл хуҗалыгы институтында белем алган көрәшче егетләр хакында. Китапның беренче өлешендә остаз турында язмалар урын алган. Аннан инде институтта төрле елларда белем алып, көрәш дөньясында танылу алган батырлар хакында сүз бара. Китап Әсгать Шәйхетдиновның иң талантлы шәкертләреннән берсе - СССРның спорт остасы, Татарстанның атказанган спорт остасы Рәшит Сәмигуллинның матди ярдәме белән чыгарылган.