Төркиядә милләттәшебез татар шәхесләрен таныта

Төркиянең Анкара каласында яшәүче милләттәшебез филолог, язучы, тәрҗемәче Роза Корбанның “Төрки дөнья тарихы һәм мәдәнияте” журналында якташы, мәгърифәтче Каюм Насыйрига багышланган мәкаләсе дөнья күрде. 

Бу хакта “Идел” журналына галимә Роза Корбан шәхсән үзе хәбәр итте. Роза Корбан Татарстан кызы, ул Яшел Үзән районы Мулла Иле авылыннан. Танылган татар галиме Гомәр ага Саттаровның туганы. 1995 елдан бирле Төркиядә гомер итә. Анда төрек басмаларында татарның данлыклы шәхесләрен пропагандалау эшен дә алып бара.
“2020 елның башыннан “Төрки дөнья тарихы һәм мәдәнияте” журналының “Идел-Урал зыялылары” исемле сәхифәсендә танылган татар зыялылары турында яза башладым, - ди Роза ханым. – Язмам геройларын шәхсән үзем билгелим. Каюм Насыйрига тукталуымның сәбәбе бөек мәгърифәтчене төрки дөньяда яхшы беләләр. Әле үзе исән чагында да аның өендә чит ил галимнәре кунак булганы мәгълүм. Төрек телендәге хезмәтемне “Ике гасырга сыймаган зыялы Каюм Насыйри”, дип атадым. Биредә киң кырлы татар галименең тормышы һәм иҗаты тәкъдим ителә. Заманында Казанда Төркиянең “Икъдам” газетасы хуҗасы Әхмәт Җәүдәт Насыйри белән очрашкан... Төрекләр К. Насыйрины үзләренең танылган язучылары Әхмәд Мидхәткә дә охшата. Әхмәд Мидхәттә саф төрек теле өчен җан аткан, Насыйри да татар әдәби телен үстерү, әдәбиятны халыкка якынайту өлкәсендәзур гамәлләр башкарган шәхес бит”.

Язмада Насыйри әсәрләре, иҗаты һәм эшчәнлегенең бүгенге көндәге әһәмияте бирелә. Туган ягы Ачасыр, Казандагы музейлары, К.Насыйри премиясенең асылы турында да язылган.
 “Төрек теле”  журналының апрель санында исә, Роза Корбанның тагын бер күренекле галимебез Гомәр Саттар турында да мәкаләсе дөнья күрәчәк. Әлеге язмасында “Татар исемнәре” китабы турында әтрафлы мәгълүмат биреләчәк. 
Милләтебез улларын дөнья аренасына чыгаруда тырышлык күрсәткән Роза Корбанга киләчәктә дә уңышлар гына телисе килә.