“Авызыңны ач” – ифтар түгел, уку буенча чемпионат ул...

Дөньяда нинди генә максатлар белән нинди генә чемпионатлар уздырылмый! Шундый гадәти булмаган чемпионатларның берсе – кычкырып урысча уку буенча “Авызыңны ач” – 16 майда “Смена” заманча мәдәният үзәгендә 19.00 сәгатьтә башлана. Анда 18 яшьтән олырак теләгән һәркем катнаша ала.

Чемпионат кагыйдәләре буенча, катнашучылар формаль булмаган шартларда, алдан әзерләнеп тормыйча гына оештыручылар тарафыннан сайланган текстларны укый. Жюри уку техникасын һәм артистизмны бәяли. Җиңүчеләр исә мәгълүм бер нәшриятның китаплары белән бүләкләнә. Шунысы кызыклы, “Авызыңны ач” кычкырып уку буенча чемпионаты инде 2011 елдан бирле яшәп килә икән һәм илдәге иң массакүләм әдәби проектлардан санала. Узган ел хәтта Париж, Страсбург, Лондонда уздырылган. Быелгы чемпионат Русиянең 200дән артык шәһәрендә уза. Финалы 2019 елда җәен Мәскәүдә үтәчәк.

Әлеге чараның “онытыла барган” һәм “кысрыкланган” урыс телен саклау һәм пропагандалау максатыннан оештырылуында шик тумый. Беренче карашка, уен кебек тоелса да, монда барысы да бик җитди: элекке еллар хөкемдарлары арасында телевидение алып баручылары Владимир Познер һәм Фекла Толстая, Великобританиянең Мәскәүдәге илчесе Лори Бристоу, язучылар Александр Снегирев, Андрей Аствацатуров, Александр Цыпкин, шагыйрьләр Всеволод Емелин һәм Андрей Родионов, кинорежиссер Борис Хлебников, артистлар Екатерина Шпица һәм Евгений Сытый, наширләр Ирина Прохорова, Борис Куприянов, Михаил Котомин һ.б. бар.

Максаты нинди генә булмасын, әлеге чемпионат гадилеге һәм, шул ук вакытта, креативлыгы белән сокландыра. Аны рәхәтләнеп татар яшьләре активистлары һәм язучылары да, татар телен саклауда һәм популярлаштыруда кызыклы эш формасы буларак, рәхәтләнеп куллана алыр иде.