УРАМ АРТИСТЛАРЫН ТӘРТИПКӘ САЛАЧАКЛАР

35 урынны Казанда урам музыкантлары, артистлары һәм рәссамнары чыгышлары өчен бүлеп бирү планлаштырыла. Алар датаны һәм вакытны махсус кушымта аша сайлый алачак. Бүген журналистларга шәһәрнең Мәдәният идарәсе башлыгы Азат Абзалов урам артистлары эшчәнлеген җайга салу өчен Казанда кертү планлаштырылган кагыйдәләр турында сөйләде.

Азат Абзалов, Казан Мәдәният идарәсе башлыгы

«Казанда иҗат тормышының зур өлеше җәмәгать киңлекләрендә һәм шәһәр урамнарында уза. Мәсәлән, Бауман урамы – Казанның йөрәге, бу урам аерым яши, ул кунакларга кәеф бирә, ә биредә чыгыш ясаучы музыкантлар, артистлар, рәссамнар һәм урам театры вәкилләре моңа ярдәм итә. Алар барысы да шәһәрнең иҗади тормышына зур өлеш кертә»

Әйтик, Казандагы урам мәдәнияте вәкилләренә уңайлы булсын өчен махсус кушымта эшли башлаячак, алар аның аша чыгыш өчен урыннарны броньлый алачак. Бүгенге көндә 35 урын билгеләнгән – шәһәр үзәгендә дә, паркларда да, скверларда да. Алар арасында – Бауман, Петербург урамы, Совет мәйданы, Горький исемендәге парк, Даурия урамындагы сквер, «Чишмәле» скверы, Петров исемендәге парк һәм башкалар. Вакыт узу белән урам артистлары чыгышы өчен мәйданчыклар барлык кирәк-яраклар белән җиһазландырылачак дип көтелә.

Һәр артист кушымта аша үз чыгышының урынын һәм вакытын сайлый алачак, ул 2 сәгатьтән дә артык дәвам итмәячәк. Урыннар артистларга, музыкантларга һәм рәссамнарга көн дәвамында бушка биреләчәк.

Кушымтаның һәр кулланучысының урыны музыкант, театр сәнгате, рәссам, фотога төшерү буенча хезмәтләр категориясенә карап билгеләнәчәк.

Регламентларда жанр яки башкару стиле контрольдә тотылмаячак. «Без цензура һәм артистлар өчен программа сайлау белән шөгыльләнергә теләмибез. Без сәнгать киңәшләре булган башка шәһәрләр үрнәге буенча барырга теләмәдек. Һәркем үзе теләгән иҗат белән шөгыльләнә, иң мөһиме – расизмга, экстремизмга өндәмәү, – дип билгеләде Азат Абзалов.

Үзкөйләнешле кагыйдәләр урам артистларының фикерләрен исәпкә алып төзәтелергә мөмкин. «Кагыйдәләр белән документлар – ул «тере организм», ул даими үзгәреп торачак һәм артистларның теләкләреннән чыгып камилләштереләчәк. Без нәкъ менә шундый алым өчен», – дип хәбәр итте Азат Абзалов.

Документ зур курчакларның эшчәнлеген контрольдә тотарга мөмкинлек бирәчәк. Мәсәлән, үз-үзләрен тоту кагыйдәләрен бозган очракта аларга үз хезмәтләрен күрсәтү өчен башка урыннар тәкъдим ителәчәк яки, гомумән, аларны кушымтадан төшереп калдырачаклар. «Әгәр дә зур курчаклар хезмәте күрсәтелә икән, без моның ишәк һәм зебра булуын түгел, ә Казан белән бәйле символларның булуын, һәм без аниматорлар белән сөйләшүләр барышында булуын теләр идек», – дип хәбәр итте Азат Абзалов.

Казанда урам чыгышлары тәртибе турындагы документны эшләүтурында гыйнвар аенда «Сәйдәш» мәдәният йортының түгәрәк өстәлендә билгеле булды. Ул вакытта урам чыгышларын легальләштерү мәсьәләсе массакүләм мәгълүмат чаралары вәкилләре, җәмәгатьчелек, Бауман урамындагы йортларда яшәүчеләр, блогерлар, Башкарма комитет бүлекчәләре җитәкчеләре, экскурсоводлар, музыкантлар, Казан шәһәр Думасы депутатлары һәм башкалар катнашында тикшерелде.

Бүгенге көндә коррупциягә каршы экспертиза уза торган урам музыкантлары эшчәнлеген регламентлаучы карар проекты эшләнде.

Чыганак: kzn.ru