Владимир Путин Минтимер Шәймиев белән очрашкан

Россия Президенты Владимир Путин Иннополиста узган РФ Дәүләт Советы президиумы утырышыннан соң Татарстанның беренче Президенты, Дәүләт Киңәшчесе Минтимер Шәймиев белән очрашкан.

Путин Минтимер Шәймиевкә республика үсешенә керткән өлеше, шулай ук стратегик проектларны гамәлгә ашыруы өчен рәхмәт белдергән. Ил башлыгы Шәймиевнең Болгар ислам академиясен булдыруга керткән өлешен билгеләп үткән һәм анда Кыргызстан руханиларын укыту мөмкинлеге турында сөйләшкән. Күптән түгел генә Россия Президентының Кыргызстан башлыгы Сооронбай Жээнбеков белән очрашу барышында шул хакта сөйләшү булган икән.

Минтимер Шәймиев исә Владимир Путинга әлеге проектны гамәлгә ашыруда күрсәткән ярдәме өчен рәхмәтен җиткергән һәм иганәчеләр китабының тугызынчы томын бүләк иткән. Әлеге томда Россия Президентының да исеме бар.

Фото: president.tatar.ru