Яңа елда ничек ял итәбез?

Татарстанлыларның Яңа ел каникуллары 8 көн рәттән: 1-8 гыйнварда - дәвам итәчәк. 2020 елда ялларның гомуми саны биш көнлек эш атнасында 120 көн тәшкил итәчәк.

ТР Хезмәт, халыкны эш белән тәэмин итү һәм социаль яклау министрлыгы календаре нигезендә, киләсе елда Татарстанда Яңа ел каникуллары һәм Раштуа бәйрәмнәреннән тыш, бәйрәм көннәре булып түбәндәгеләр санала: 23 февраль - Ватанны саклаучылар көне, 8 март - Халыкара хатын-кызлар көне, 1 май – Яз һәм хезмәт бәйрәме, 9 май – Җиңү көне, 12 июнь – Россия көне, 30 август – Татарстан Республикасы һәм Казан шәһәре көне, 4 ноябрь – Халыклар бердәмлеге көне, 6 ноябрь - Татарстан Республикасы Конституциясе көне, шулай ук Ураза һәм Корбан бәйрәмнәре.

Ай календаре һәм гореф-гадәтләргә туры китереп, Ураза һәм Корбан гаете бәйрәмнәрен үткәрү көннәре соңрак Татарстан Республикасы Президенты указы белән билгеләнәчәк. Дини мөселман бәйрәмнәрен бәйрәм итүнең алдан куелган датасы - 24 май һәм 31 июль.

Ял һәм эшләми торган бәйрәм көннәре туры килгән очракта, ял көне бәйрәмнән соң килгән эш көненә күчерелә. Шулай итеп, икенче эш көненә Халыкара хатын-кызлар көне (9 мартка), Ватанны саклаучылар көне (24 февральгә), Җиңү көне (11 майга), шулай ук 4 гыйнвардан (шимбә) ял көннәре 4 майга, 5 гыйнвардан (якшәмбе) 5 майга күчерелә.

Шулай итеп, ике ял көне булган биш көнлек эш атнасында ел дәвамында эш көннәре саны 246 көн тәшкил итәчәк, шул исәптән бер сәгатькә кыскартылган 7 көн (30 апрель, 8е май, 11 июнь, 30 июль, 3 һәм 5 ноябрь, 31 декабрь), ә ял көннәре саны 120 көн, шул исәптән 17 эшләми торган бәйрәм көне һәм 5 өстәмә ял көне, дип хәбәр итә ТР Хезмәт, мәшгульлек һәм социаль яклау министрлыгы матбугат хезмәте.

kzn.ru