Яңа уку елыннан телефоннарны мәктәпләрдә тыярга җыеналар 

Федерация Советы спикеры Валентина Матвиенко фикеренчә, укучыларга телефоннарны уку йортларына кертүне тыярга кирәк, чөнки аларны саклау өчен тиешле шартлар каралмаган. Ул әлеге мәсьәләне 1 сентябрьгә кадәр хәл итәргә кушты. 

"Гомумән, телефоннарны мәктәпкә йөртүне тыярга кирәк, чөнки мәктәпләрдә аларны саклау өчен шартлар каралмаган. Хәзер һәр балада кыйммәтле телефон, ул аны онтып калдырырга мөмкин, аннары әлеге телефон юкка чыгачак һәм мәктәп директорлары мондый җаваплылыкны үз өстенә алмаячак», - диде Валентина Матвиенко гаиләне һәм балаларны яклау өлкәсендә дәүләт сәясәтен гамәлгә ашыру буенча РФ Президенты каршындагы Совет утырышында. 

"Роспотребнадзор" башлыгы Анна Попова, үз чиратында,Валентина Матвиенкога мөрәҗәгать итеп, мәктәпләрдә телефоннардан файдалану тәртибе турындагы мәсьәлә буенча эшче төркем оештырырга тәкъдим итте. 

"Сергей Сергеевич Кравцов, Мәгариф һәм фән өлкәсендә күзәтчелек буенча Федераль хезмәте башлыгы һәм Юрий Петрович Зинченко, Россия мәгариф академиясе башлыгы белән безнең уртак тәкъдим - мәктәптә телефоннардан файдалану тәртибе турында эшче төркем төзү. Без бергә әлеге проблема өстендә эшләбез һәм бер айдан соң сезгә карар кабул итәргә әзер план булдырырбыз», - диде Попова. 

Утырыштан соң, журналистлар белән сөйләшкәндә, Валентина Матвиенко мәктәпләрдә телефон куллану проблемасы күптән популяр булып торуын искәртте. Аны катгый тыю чаралары белән генә хәл итәргә ярамавын билгеләп үтте. “Бәлки, телефоннарны саклау өчен шартлар тудырырбыз, тик телефоннарны класска алмаска кирәк!”, дигән фикер яклы булуын ассызыклады. 

«Күп кенә укытучылар, директорлар һәм ата-аналар телефоннарның булуы, бигрәк тә кече сыйныф балаларының уку процессынна, укытучыга дәрес алып барырга комачаулавын белдерә. Тәнәфестә аралашу, хәрәкәт итү урынына, телефонда утыралар, уеннар уйныйлар», - диде спикер. 

Дәүләт Думасының Мәгариф һәм фән комитеты рәисенең беренче урынбасары Геннадий Онищенко балаларга мәктәпкә кесә телефоннарын алып килүне тыймау яклы. Тик уку биналарына кергәндә гаджетларны саклау өчен камералар куелган урын әзерләргә, аларны дәрес вакытында шунда 

тапшырырга тәкъдим итә. Аның фикеренчә, гади тыю юлы күп кенә аңлашылмаучанлыкка китерергә мөмкин. Ул әлеге сорауны хәл иткәндә ата-аналар фикерен дә күздә тотарга кирәклеген искәртте. 

"Өстәвенә, бүген балалар күнеккән, һәм әниләр дә, теләсә кайсы мизгелдә, әйтик, йөрәк борчылган чакта, шалтырату төймәсенә басып, балаларының тавышын ишетеп, тынычлана алалар. Болай алар көне буе борчылып йөриячәкләр », - дип өстәде Онищенко. 

Фото: Пиксбей