Яшь галим БӘРӘҢГЕ ИГҮ ТЕХНОЛОГИЯСЕН камилләштергәне өчен Россия Президенты грантына ия булды

Татарстан Авыл хуҗалыгы һәм азык-төлек министрлыгы карамагындагы аграр югары уку йортының яшь галиме Марат Кәлимуллин Россия Федерациясе Президенты грантына ия булды.

Әлеге грант «Техник фәннәр» юнәлешендә Россия икътисадын модернизацияләүнең өстенлекле юнәлешләре буенча перспективалы фәнни тикшеренүләрне һәм эшләнмәләрне гамәлгә ашыручы Россиянең галимнәренә – фән кандидатларына һәм докторларына дәүләт ярдәме күрсәтү уңаеннан тапшырыла.

Казан дәүләт аграр университетының Механикалаштыру һәм техник сервис институтының машиналарны эксплуатацияләү һәм ремонтлау кафедрасы профессоры Марат Кәлимуллин бәрәңге игү технологиясен технологик операцияләр белән камилләштерде.

«Бүгенге көндә чит ил техникасы җитештерүчәнлеге, технологик процессны башкару сыйфаты, экономияле булуы буенча безнең аналоглардан күпкә өстенрәк тора, әмма бәясе ягыннан шактый кыйммәткә төшә. Барлыкка килгән вәзгыять авыл хуҗалыгы товар җитештерүчеләрен чит ил предприятиесе тарафыннан тәкъдим ителә торган барлык механикалаштыру чаралары комплексын сатып алырга мәҗбүр итә, бу илебезнең авыл хуҗалыгы җитештерүен импортка тулысынча бәйле итеп куя», - дип сөйли яшь галим.

Марат Кәлимуллинның тикшеренүләре мөһим проблемаларны хәл итүгә - бәрәңге үстерү технологиясен технологик операцияләр белән камилләштерүгә һәм югары икътисади нәтиҗәгә ирешү өчен эш органнары булдыруга юнәлдерелгән. Камилләштерелгән технология бәрәңге үстерү өлкәсендә эшләүче агросәнәгать комплексы оешмалары өчен билгеләнгән.

Технологияне гамәлгә кертү тагын да югарырак икътисади нәтиҗәгә ирешергә һәм чит ил авыл хуҗалыгы техникасын үзебезнекенә алыштырырга мөмкинлек бирәчәк.