«Әйдә ШаяРТ»: татар ШТКсына рембрендинг ясалган

2019 елда Шаяннар һәм Тапкырлар Клубының Татар лигасына 25 ел тулды. Шул уңайдан ул, тагын да үстерелеп, географиясе киңәйтелеп һәм рембрендинг ясалып, «Әйдә ШаяРТ» дигән яңа исем йөртә башлады һәм республика статусын алды.

Татар лигасы уеннары берничә этапта уздырыла. Беренчесе – район этаплары күптән түгел генә төгәлләнде: лиганың кураторлары Татарстан Республикасы районнарына чыгып, КВН мәктәбе оештырды, катнашучыларны укытып, сайлап алу турларын уздырды. 

Киләсе этап фестиваль форматында узачак һәм район этапларында гран-при яулаган барлык командаларны Казанда җыячак. 2019 елның 27 май аеннан 2 июньгә кадәр фестиваль башкалада дәвам итеп, зур һәм тантаналы гала-концерты белән тәмамланачак. Анысы 2 июньдә Г. Кариев ис. Казан Татар дәүләт яшь тамашачы театрында уздырылачак. Ул заманча телевизион юмористик шоу форматында булачак. 

Оештыручылар: Бөтендөнья татар яшьләре форумы, Tatar Production иҗат берләшмәсе, КВН РТ, Татарстан Республикасы Яшьләр эшләре министрлыгы, Татарстан Республикасы Мәдәният министрлыгы.

ФОТО: vk.com