Җыр-биюгә корылган "Зәңгәр шәл"

11 һәм 12 ноябрьләрдә Казан шәһәр филармониясе Камал театры сәхнәсендә “Зәңгәр шәл” дип исемләнгән вокаль-хореографик тамаша күрсәтте. Әлеге матур тамаша ТАССРның 100 еллыгына багышланды. 

Кәрим Тинчуринның “Зәңгәр шәл” пьесасы буенча куелган вокаль-хореографик тамашада төп рольләрне Фердинанд Фәтхи, яшь артист Рөстәм Насыйбуллин, “Фәридә-Алсу” дуэты җырчылары Фәридә Әхмәтшина белән Алсу Сөнгатуллина, Марина Карпова, Гөлназ Гафурова һәм Чулпан Закирова ("Казан" бию ансамбле җитәкчесе Чулпан Закирова тамашаның идея авторы һәм куючысы да) башкарды. 

Тамашаның биюләре бик югары дәрәҗәдә башкарылган иде. Ләкин бу спектакльгә тамашачы гадәттә бик яратып карый торган диалоглар кертелмәгән. Мәсәлән, урмандагы качкыннар арасында ат карагы, ялган акча ясаучы һәм башка персонажлар бөтенләй юк. Аларга алмашка, затлы киемле, зифа буйлы качкыннар сәхнәдә төрле акробатик номерлар күрсәтеп, тамашачыны бию белән шаккатырды. Җырлы-биюле Сабан туе күренешләре дә гаҗәеп матур куелган иде. 

Әлеге спектакль ике көн рәттән Камал театрының зур залын тутыра алды. Тамашачылар арасында балалар да шактый бик күп иде. Алар спектакльне бик ошаттылар. 

Тамашадан соң, ТР Мәдәният министры урынбасары Дамир Натфуллин ансамбльне уңышлы яңа программа белән котлады. Театр артисты Наталья Егоровага Татарстанның атказанган артисты исеме бирелде.

19 ноябрьдә спектакль Арчада куелачак.