"Җыр-бию тансык түгел, ә менә көрәәәш!"

Ижауда милли көрәш федерациясе барлыкка килде. Ул үз эшен Ижау шәһәренең Азин урамында урнашкан Җәмигъ мәчете карамагындагы спорт залында алып барачак. Бүгенге көндә тренер мәсьәләсе хәл ителә, ә оешма рәсми яктан теркәлгән, тиешле кәгазьләр инде әзер икән.

Фаиз хәзрәт һәм федерациянең җитәкчесе Илнур Рамазанов әйтүенчә, әлегә алар милли көрәшне Сабан туе бәйрәмнәрендә генә күрәләр. “Көрәш башландымы, бар халык сәхнәдә барган җыр-биюне калдырып, көрәш мәйданына ашыга. Җыр-бию тансык түгел, аны кайчан да тыңларга, карарга була. Ә менә көрәәәш!”, - ди үзләре бу хакта.

Милли көрәш дәресләре бирүне  киләсе уку елыннан башлап җибәрергә ниятлиләр.  Илнур Рамазанов: “Бүгенге көндә бу юнәлештә эш башлап җибәрү бик мөһим. Республикада федерация булмагач, яшь буын  республикабыз исеменнән  Россия күләмендә уза торган милли көрәш бәйгеләрендә катнаша алмыйлар. Көрәш серләрен өйрәтү дәресләренә башлангыч сыныф укучыларын туплау күздә тотыла.  Әлбәттә, республикабызда оста көрәшчеләр үстерү өчен вакыт таләп ителә. Бүгенге көндә әзерлекле балалар юк, әмма башланган эш – беткән эш. Оештыручыларга изге сәгатьтә диясе генә кала.

tatar-congress.org

фото: интернеттан