Әзәрбайҗан Демократик республикасы оешуга 100 ел тулды

Төрки дөнья бүген Әзәрбайҗан Демократик республикасы оешуга 100 ел тулуны билгеләп үтә. Тугандаш халыкның тарихи датасы уңаеннан үткәрелә торган чаралардан, әлбәттә, Татарстан да читтә калмый.

Татарстанда һәм Русиядә әзәрбайҗаннар диаспорасы иң көчлеләрдән һәм иҗтимагый активлардан санала. Әзәрбайҗан вәкилләрен бүген республикада бизнеста да, сәнәгатьтә дә, сәясәттә дә күрергә мөмкин. Әзәрбайҗаннар җәмгыяте ел саен төрле мәдәни һәм хәйрия чаралары уздыра.

Бүген ТР Фәннәр Академиясенең Шиһабетдин Мәрҗани исемендәге Тарих институтында Әзәрбайҗан Демократик республикасы оешуга 100 ел тулу уңаеннан фәнни конференция уза. Конференциядә ӘДРның аякка басу этаплары, азәри дәүләтенең үсеше тарихы, ӘДРның эшчәнлеге һәм казанышлары мәсьәләләре күтәрелә. Конференциядә Әзәрбайҗан Тарих институтыннан кунаклар, Татарстанда яшәүче азәриләрнең “Әзәрбайҗан” милли-мәдәни мохтарияте вәкилләре, ТР Дәүләт Советы вәкилләре, Мәрҗани исемендәге Тарих институты хезмәткәрләре, әзәрбайҗан милләтеннән аспирантлар һәм студентлар катнаша һәм чыгыш ясый.

ӘДРның 100 еллыгы уңаеннан планлаштырылган чараларның берсе – бәйрәм кичәсе Татарстан Халыклары Дуслыгы йортында узды. Бәйрәм уңаеннан җәмгыять җитәкчеләре, ТР Дәүләт Советы вәкилләре котлауларыннан соң концерт булды. Тамашачылар алдында «Kavkaz style» ансамбле, «Назлы» бию коллективы һәм солист Җәлә Гасанова, «Сакартвело» грузин бию ансамбле, солистлар Нәргиз Хәлилова, Эмилия Абдуллаева һәм Әлмәттән яшь артистлар Яһут, Зәхра, Нурлан Исмаиловлар чыгыш ясады. Шулай ук Әзәрбайҗаннан килгән кунаклар – инструменталь ансамбльгә кушылып халык җырларын башкаручы Раушан Әзиз, Әзәрбайҗанның атказанган артисткасы Самира Алиева һәм җырчы Али Таптых оглы җырлады.