Айдар Фәйзрахмановны бүләкләү указына В.Путин кул куйды

РФ Президенты Владимир Путин Г.Тукай исемендәге Татар дәүләт филармониясе һәм Татарстан дәүләт фольклор музыкасы ансамбленең сәнгать җитәкчесе Айдар Фәйзрахмановны Дуслык ордены белән бүләкләү турындагы указга кул куйды.

А.Фәйзрахманов илебезнең мәдәнияты һәм сәнгатенә зур өлеш керткәне һәм күпьеллык нәтиҗәле хезмәте өчен әлеге орденга лаек дип табыла.

Габдулла Тукай исемендәге Татар дәүләт филармониясенең һәм Татарстан Республикасы фольклор музыкасы дәүләт ансамбленең сәнгать җитәкчесе – Россиянең атказанган, Татарстанның халык артисты, Г. Тукай исемендәге Дәүләт премиясе Лауреаты, профессор, Татарстанда, Россиядә һәм бик күп чит илләрдә дан казанган иҗатчы Айдар Фәтхерахман улы Фәйзрахмановка быел 65 яшь тулды.