Китап сатучы балаларны әти-әниләреннән алганнар

“Бу акчага нәрсә аласыз?” – дигән сорауга балалар: “Аны әти аракыга тота”, - дип җавап биргәннәр…

Опека хезмәткәрләре Казандагы 11 яшьлек кызны һәм 8 яшьлек малайны гаиләләреннән алалар. Хәзерге вакытта әти-әнине тикшерәләр, әгәр бернинди дә хокук бозу очрагы табылмаса, балаларны кире гаиләләренә кайтарачаклар.

Балаларның гомеренә бернинди куркыныч янамый үзе: гаиләнең фатиры әйбәт, кыз белән малай киендерелгән, ашатылган. Ләкин барыбер ата-ана хисапта тора. Әниләрен ата-ана вазыйфасын үтәмәгән өчен ике тапкыр административ җаваплылыкка тартканнар. Ахыргы тапкырында – кечкенә баласын мәктәпкә бирмәгәне өчен.

Прокуратура тикшерүе әтиләренең китап саткан акчага аракы алу фактын дөрес түгел дип таныды. Балаларның әти-әниләре эшлиләр, ләкин рәсми рәвештә түгел. “Исерткеч эчемлекләрне кулланалар, әмма кайвакыт кына”, - дип әйтә гаиләнең таныш-белешләре.