Кеше ите ашамыйк...

Бу арада шоу-бизнес дөньясы хәйран  болганып алды. Социаль челтәрләрдә,  массакүләм мәгълүмат чараларында "Барс медиа" компаниясе турында Ландыш Нигъмәтҗанова, Фирдүс Тямаев, Илсөя Бәдретдинова һәм башка артистларның фикерләре яңгырады.

Билгеле инде, аларның фикерләренә каршы белгәне-белмәгәне мең төрле коммент язды. Бездә - татарда  "Ат аягын дагалаганда бака ботын кыстырган" дигән мәкаль бар. Бүген сүзем "Барс медиа" компаниясе, андагы вәзгыять, артистлар турында түгел, ә бәлки аралашу әдәбен, кешелек мөнәсәбәтләрен оныткан шул "бакалар" турында...

Хәтерләсәгез, берничә ел элек "Булмас.ру" сайты мондыйларга тулы мөмкинчелек ачты. “Сайт бөтен җырчыларны да әйбәтләп чәйнәргә мөмкинлек ача, әгәр җырчылар турында берәр яңалык, гайбәт ишеткәнсез икән, монда кереп язып чыгып китәргә була. Гайбәт кенә димәгән, биография булса да ярый. Бәлки кайда яшәгәннәрен, яисә телефон номерларын белә торгансыздыр. Әлбәттә, аларның телефон номерларын, я булмаса гайбәтләрне сайтта урнаштыруыгызны тыя алмыйм!

Шулай да, йолдызлар турында үзегезнең фикерегезне әйткән вакытта аларны артык рәнҗетмәскә тырышсагыз иде - каргышлары төшәр! Сез язган комментарийлар өчен сайт җитәкчелеге җавап тотмый. Һәркем, сайтта язган сүзләре өчен үзе җаваплы. Теләсә кем теләсә нәрсә яза алганга күрә, монда язылганнарны да чын итеп кабул итмәскә кирәк!
Шулай ук, "йолдызларга", публик шәхесләр буларак, монда язылган критикага, гайбәткә үпкәләмәскә киңәш итәм, әгәр алар, олы башларын кече итеп, бу сайтка керәләр икән" дип яздылар алар сайтның баш битендә.  Шуннан китте инде...

Татар эстрадасы артистлары турында кем нәрсә язасы килсә, шуны язды. Сайт җыен гайбәт, шакшы белән тулды. Бүгенге көндә  сайт җитәкчесе Рүзил Мөхетдинов башлаган "бөек эш", шөкер, туктады, әмма теге татар артистларын "зурлаган" сүзләр тарихка кереп калды. Хәзер инде гайбәт чәйнәргә яңа мөмкинлекләр ачылды. Чөнки социаль челтәрләрдә һәр җырчының үз бите бар. Шул битләрдә рәхәтләнеп,  елан агуын сипкәндәй,  кайбер туташ һәм ханымнар  теләсә-нәрсә язып утыралар, зәһәрләрен чәчәләр.      Белгәнебезчә, бу турыда  "Шәһри Казан" газетасының баш мөхәррире Радик Сабиров та язып үтте.

Шундый ямьсез язмалар укыйсың да "Эх, җәмәгать, нинди көнгә төштек без" дип шаккатасың. Әйтерсең, капка төбендә гайбәт сатучы хатын белән аты-юлы белән сүгенүче кушылган да ниндидер тагын да явызрак, шакшырак интернет аҗдаһасы барлыкка килгән. 

Шушы аҗдаһалар авызыннан әллә кемнәрдән ишеткән, әллә булган, әллә булмаган ниндидер вакыйгалар турында шакшылар агыла. Аларга кушылып кайбер артистлар үзләре да агу чәчә. Бу шакшы, агу ага,  ага да бөтен дөньяны тутыра,  яндыра, сасыта.

Татар халкы, татар мәдәнияте өчен оят булып китә. Халык  өчен үрнәк булырга тиешле кешеләрнең үзара мөнәсәбәте, тамашачыларының аларга карата булган мөнәсәбәте тетрәндерә...        

Билгеле, без беребез дә фәрештә түгел. Һәркайсыбызның да кимчелекләре, җитешмәгән яклары җитәрлек. Әмма сүз иреге дип, бөтен дөньяга теләсә-нәрсә сөйләп, язып утыру да хәерле гамәл түгел, җәмәгать. Әйе, артист халкының тормышы - барлык кешенең күз алдында. Кеше нигәдер алар турында сөйләүдән аерым бер тәм таба, ягъни кеше ите ашый. Әйе, барыбыз да белгәнебезчә, Аллаһы Тәгалә кешеләр гайбәт сөйләмәсеннәр өчен гайбәтне шундый мисал белән җирәнгеч итеп тасвирлый. Гайбәтчене кеше ите ашаучыга тиңли...  

Язмам ахырында инде бары бер теләк : татар артистлары да, аның турында гайбәткә кермәсеннәр өчен, шикле сүзләрдән, шикле урыннардан сакланырга, ягъни гайбәт өчен җирлек тудырмаска тиеш. Һәм инде без дә, үз чиратыбызда, телебезне саклыйк. Бик телебез кычытса да, тыелыйк. Сөйләгән сүзләребез, язган җөмләләребез матур, төзек булып, файда гына китерсен, кешеләрнең күңеленә хуш килсен иде!