МАГНИЙ В6

Илүзә - аерым дөнья. Үз кагыйдәләре, үз тәртипләре, үз карашы булган. Аның Инстаграм битен озаклап, тәмләп һәм ... ачынып укырга була. Шуның өчен якын да ул, шуның өчен кирәк тә.

Җир йөзендә иң куркыныч, иң имәнгеч кеше беләсезме кем? Кимсенгән кеше. Кимсетелгән түгел, ә нәкъ менә борлыккан адәми зат.

Кимсенгәннән теләсә ни көтәргә була. Аның шулай "нәүмизләнеп" йөрүенә аңардан кала җиһандагы җаны булган һәм булмаган һәркем-һәрнәрсә гаепле! Хәтта юлда яткан мескен таш та аның юлында тау булып ята.

Кибеткә һәр көнне диярлек тормышта үзен таба алмаган галим/рәссам/архитектор һ.б. "буш колак эзләп" керә.

Һәм башлана сүгү, башлана теге яки бу китапны күтәреп килеп, шул китапны яисә аның авторын хурлау. Күп очракта, дәлилсез, нигезсез сүз боткасы. Шулчак миндә теге кыбырсык җан уяна, эчтән генә сүгенә, буран куптара. Йөздә исә - куркыныч тынычлык. Бүтәнчә ярамый, диләр, эшлекле этика, син кеше кешесе, Илүзә түгел, диләр. Шунда мин Сәвия апаның телефоннан берәүне сүккәнен искә төшерәм: "Син нәрсә, этика белән эстетиканы белмисеңме әллә?". Кызык булып китә, теге "башлы" онытыла. Эчтәге буран тына төшә.

Шулчак.

Теге. Орфографик сүзлекне күтәреп килеп. Юк, төртеп кенә күрсәтми. Ярты кибетне узып. Минем яныма касса артына ук үтеп кереп. "Сез татарча сөйләшәсезме" диеп (гәрчә кибеткә керүеннән үк татарча гына аралашсам да). "Фаҗигале" сүзен күрәсезме, диеп. Миңа ул сүзне 3 кат әйттереп. Дөрес укымыйсыз, язылганча укыгыз диеп. Минем укылыш белән язылыш, сингармонизм, фарсы алынмалары хакында аңлатуыма "төкереп". Сүзнең "фаҗыгалы" дип укылып язылырга тиешлеге турында лаф ора башлый. Менә фаҗига, ә!

Хезмәттәшем "Магний" алып киләм, эчә башларсың, ди әле әнә.

Магниен да эчәрсең, тынычланырсың да, ә көннән-көн арткан кимсенгәннәрне, аның сәбәбен кая куярсың?

Илүзә Гайфуллина