Белеп яшә

Илдус Гыйләҗевнең 1997 елгы шигыре

Татар кызы көлеп каршы алса, 
Җир читендә берәр кибеттә –
Гаҗәпләнмә, бик тә табигый хәл, 
Без сәүдәгәр элек-электән.

Җил тизлеге белән, елдам егет 
Иярләсә ярсу айгырны –
Аңлап күзәт, безнең нәсел булыр, 
Без тарихта батыр яугирләр.

Үзәкләрне өзеп ала торган
Җыр ишетсәң, моң-зар тулышкан – 
Белеп тыңла, язмыш тәкъдиредер, 
Без сагышлы милләт тумыштан.

Берәр халык күрсәң түзем, чыдам,
Итагатьле хәйран калырлык – 
Сокланып бак, бәлки... кызганыптыр,
Безнең юлдаш булды – сабырлык...

«Идел», N4, 1997 ел

Фото: pixabay.com