"Ак Барс" уенчылары өчен махсус җыр: "Чума үрдәк, чума каз"

Хәзерге балалар интернетта гына утыра инде дип, аларның үзара русча сөйләшүләренә, уеннар белән мавыгуын табигый хәл итеп кабул итсәк тә, интернетта балалар өчен менә дигән татарча контент эшләргә мөмкин икән бит! "Салават күпере" балалар журналы шул юнәлештә эшли дә инде - "СалаваTik" белән татар җырларын өйрәтә. Матбугат конференциясендә бу хакта тулырак сөйләделәр.

- Бу авыр эш, аның нигезендә татар халкының гадәтләре, җырлары ята, - дип сүзен башлады "Татмедиа" АҖ генераль директоры Шамил Садыков. - Хәзер күп кенә балалар җырлары онытылып бара. Youtube, Tik-Tok - шундый җырларны популярлаштыру өчен менә дигән платформалар.

Шамил Садыков билгеләп үткәнчә, проект кысаларында берничә дистә җырны яздырырга ниятлиләр. Ләкин бу күп вакыт сорый, балаларны җырлату гына түгел, әлеге видеоязмаларны монтажлау, пропагандалау эшләре дә алып барыла.

"СалаваTik"тагы балалар - "Казан шәһәр филармониясе" балалар студиясе шәкертләре. Вокал бүлеге җитәкчесе Гөлназ Гафурова белдергәнчә, әлеге студиядә 20дән артык бала шөгыльләнә, ә 5-6сы - әлеге проектта чыгыш ясый.

Сәхнәгә куючы режиссер Гүзәл Шакирҗанова балалар белән эшләү бик җиңел эшләрдән булмаганын ассызыклады, видеоны төшергән вакытта кызыклы вакыйгалар булып кына тора икән.

- Хәзер инде барысы да өйрәнеп беттеләр, күзләре янып тора! - ди режиссер. - Видеолар 11 меңнән артык карау җыя, ә бу зур күрсәткеч, диде Гүзәл.

"Салават күпере" журналы баш мөхәррире Зилә Хөснетдинова проектта 16 балалар җыры яздырылачагын әйтте. Ә хәзерге вакытта "Ак барс" уенчылары өчен "Чума үрдәк, чума каз" җырын яздыру белән мәшгульләр.

- Җырны махсус татарча, русча яздырдык.  Хоккей уены вакытында безнең сабыйларны миллионлаган кеше күрер дип өметләнәбез. Шулай итеп, дөньякүләм танылган шәхесләр булырлар дип ышанабыз.

Ул шулай ук балаларның әти-әниләренә рәхмәтен белдерде. Катнашучы сабыйлар иртәләрен генә түгел, кичләрен дә "эшләп" үткәрәләр икән. Иң мөһиме - яратып башкарганнары йөзләренә чыккан иде.

фото: Султан Исхаков