Җаным-тәнем белән көрәшне яратам!

Рудияне туры эфирга чакырыр алдыннан мин, дөресен әйтәм, аның татарча көрәш белән шөгыльләнүе турында белми идем. "Ак Барс" Көрәш сараена йөрүен беләм, көрәшебезне хөрмәт итүен беләм, дзюдо яки башка көрәш түгәрәгенә йөридер дип уйлый идем.

Ә ул татарча көрәш белән шөгыльләнә икән бит! Әйе! Гүзәл затларыбызның үзебезнең көрәштә бил алышуларына каршы бит мин! Аптырам калдым шуннан соң...

Мари Иленнән ул. Йошкар-Ола шәһәреннән. Рудия Габдуллина кечкенәдән көрәшкә гашыйк булган. Татарча көрәшкә. Һәм кечкенәдән әтисен аптыраткан булган: "көрәшкә бирегез мине!". Ниһаять, әтисе ризалаша. 12 яшендә танылган тренер Илдус Гарипов түгәрәгенә йөртә башлый. Муса, Мөнир Галләмовлар белән бер залда тир түгә башлый. Башта Илдус абый шикләнә, әлбәттә. Кыз кеше бит, көрәш түгәрәгенә килгән, ичмаса, башка бер генә кыз бала да юк... Әле бит көрәшергә дә кирәк! Кызлар беләнтүгел, егетләр белән! Ә Рудия исә, ярты ел узгач, үзе әйтмешли, егетләрне уңга-сулга сала башлый. Акрынлап уңышлар да килә. Өч тапкыр Мари Иле чемпионы булып таныла! Егетләр белән көрәшеп!!!

"Башка көрәш төрен, хатын-кызлар көрәшә торганын ник сайламадың соң?" дип сорыйм аптырап.

"Белмим, башка көрәш турында уйламадым да. Әллә кемнәр, әллә кайларга чакырдылар инде. Тик, юк, мин татарча көрәшне сайладым. Әле менә ике еллап билбаулы көрәштә дә сынадым үземне, уңышлар да бар кебек, ләкин барыбер безнең көрәшкә җитми инде", - ди ул тагын бер тапкыр аптырашка калдырып. Һәм сокландырып.

Мари Иле чемпионатын ота ул. Анда откан кеше Россия беренчелегенә дә барырга тиеш. Ләкин Рудияне анда кертмиләр. Янәсе, нигезләмәдә егетләр дип язылган бит. Гомумән, рәсми ярышларга да, Сабантуйлардагы көрәшләргә дә керә алмыйча азаплана ул. Шулай да Миңгәрдә, Питрауда көрәшкән, аерым уңышларга да ирешкән.

Бер ел алар гаиләләре белән Казанга күченгәннәр. Рәхмәт төшкере, Илдус абый Рудияне монда да ташламаган. Казанда "Ак Барс" Көрәш сараена җитәкләп китергән. Җитәкчеләр, тренерлар сөйләшкән. Рудия биредә дә егетләр белән шөгыльләнә. Алар кебек үк тимер дә күтәрә (авырлык кына төрле, әлбәттә), келәмгә дә чыга. "Теләк кенә булсын, бөтен шартлар бар монда", ди көрәшче кыз.

Теләге бар бу кызның. Теләге көчле. Уңышлар сиңа, Рудия!