Быел «Ел казанышы» республика премиясенә 300 гариза килгән

26 мартта, 14.00 сәгатьтә Казан шәһәренең «Сайдаш» мәдәни үзәгендә «Ел казанышы — 2023» премиясен тапшыру тантанасы булачак. Барлыгы 9 коллектив һәм 8 шәхси номинацияләр буенча җиңүчеләр ачыкланачагын матбугат конференциясендә хәбәр иттеләр.

Татарстан Яшьләр эшләре министры урынбасары Айгөл Сабирова әйтүенчә, премиягә дәгъва итүчеләр арасыннан иң алдынгы студентларны сайлаячаклар

- «Ел казанышы» премиясе яшьләргә стимул биреп, ярдәм итү мөмкинлеге. Без Татарстанда һәр яшь кеше үзенең сайланган профессиональ мохитендә мөмкинлекләрен тормышка ашырсын өчен тырышабыз, - диде ул.

Быел конкурска якынча 300 гариза килгән, шуның күп өлеше — республика районнарыннан һәм 120 се генә Казаннан.

- Иң актив мәгариф учреждениесе - Әлмәт политехник техникумы булды, алардан 20 гариза килде. Иң популяр номинацияләр - «Елның иҗади шәхесе», «Ел спортчысы», «Гран-при» һәм «Ел җәмәгатьчесе». Номинацияләрдә җиңүчеләр премия партнерларыннан кыйммәтле һәм истәлекле бүләкләр алачак, ә Гран-при иясенә бүләкне Татарстан вице-премьеры Ләйлә Фазлыева тапшырачак. Премиянең гомуми приз фонды 350 мең сум тәшкил итә, - дип сөйләде ТР Студентлар лигасы президенты Шамил Якупов.