Быел Казанда алты иҗтимагый киңлек төзекләндереләчәк

Быел Казанда дүрт паркны төзекләндерү эшләрен төгәлләячәкләр һәм тагын ике иҗтимагый киңлекне яңарта башлаячаклар.

Бишбалта бистәсендәге Балыкчы бакчасында үзәк фонтанны реконструкциялиләр һәм балыкчы скульптурасын торгызачаклар. Биредә спорт мәйданчыклары һәм юлларның капламы яңартылачак, бию һәм башка чаралар үткәрү өчен мәйданчык булдырылачак, территорияне өстәмә яктырту һәм яшелләндерү эшләре башкарылачак.

Иске Татар бистәсендә дүрт сквер формалаштырган Юнысов мәйданын реконструкцияләү төгәлләнәчәк. Хәзерге вакытта Габдулла Тукай музее урнашкан Шамил йорты янындагы сквер узган ел төзекләндерелгән. 2023 елда калган өч скверда капламнар, кече архитектура формалары, коймалар яңартылачак, яктырту элементларын алыштырачаклар. Реконструкция Юнысов мәйданын Иске Татар стилендәге бердәм киңлек итеп кабул итәргә мөмкинлек бирә. Шул ук вакытта һәр сквер үзенчәлекле атмосфера тудырачак.

«Татарстан көзгеләре» экопроектын тормышка ашыру кысаларында Авиатөзелеш районында Зур Зәңгәр күл территориясен төзекләндерү төгәлләнәчәк. Күл буенда җәяү йөрү һәм урман терапиясе өчен табигый материаллардан ясалган сукмаклар буенча маршрутлар эшләячәк. Күзәтү мәйданнары, эскәмияләр, шулай ук навигация элементлары барлыкка киләчәк.

Нокса елгасының уң як яры буенда паркны төзекләндерүнең икенче чираты кысаларында 184 нче мәктәптән «Весна» паркына кадәрге участокта эшләр үткәрү планлаштырыла. Биредә елганың яр буе полосасын чистартачаклар һәм территорияне өстәмә яшелләндерәчәкләр, балалар мәйданчыгын, Нокса аша өстәмә җәяүлеләр күперен һәм этләр йөртү мәйданчыгын урнаштырачаклар, шулай ук «Весна» паркына кадәр агач идәннән ясалган юлны озайтачаклар. Нәтиҗәдә, 3,5 км озынлыктагы бердәм парк зонасы булдырылачак – Green торак комплексыннан алып «Весна» торак комплексына кадәр, Мамадыш тракты астында җәяүлеләр юлы белән. Беренче чиратта территориядә барбекю, воркаут һәм памп-трек өчен зоналар, шулай ук мастер-класслар уздыру өчен ял үзәге булдырылачак.

Горький исемендәге үзәк мәдәният һәм ял паркында керү төркемен реконструкциялиләр. Паркка керү каршындагы мәйданда җәяүлеләр юнәлешләре автобус тукталышыннан Билгесез солдат һәйкәле булган мемориаль комплекска таба үзгәрәчәк, шулай ук каплаулы зона һәм өстәмә яшелләндерү белән ял итү урыннары оештырачаклар. Эшләр республика төзекләндерү программасы һәм муниципаль бюджет акчалары хисабына башкарылачак.

Быел Мәскәү районындагы Серов урамында бульвар төзелеше башланачак, ул «Ярдәм» мәчетеннән Восход урамына кадәр дәвам итәчәк. Беренче чират кысаларында мәчеттән сазланган территориягә кадәр стихияле парковка бетерелә, инженерлык челтәрләре салына һәм юл катламы урнаштырыла. Скверда өстәмә яшелләндерү каралган, чаралар үткәрү өчен каплаулы күпфункцияле үзәк, төрле эскәмияләр, шул исәптән аз хәрәкәтләнүче кешеләр өчен дә урнаштырылачак. Булачак бульвар территориясе буенча яңгыр сулары канализациясе челтәрләре салыначак.

Чыганак: kzn.ru