Чаллыда татар яшьләре форумы була

Форумда Чаллы шәһәренең һөнәри һәм югары уку йорты студентлары катнаша.

Алар форум кысаларында үзләренең проектларын булдырачак, хореография, театр, вокал, КВН, ораторлык осталыгы буенча мастер-класста катнашачак. Иң шәп дип саналган проектлар ел дәвамында "Мизгел" милли мәдәният Клубы ярдәмендә чынга ашырылачак. Мәсәлән, үткән елларда "Хәрәкәттә - бәрәкәт" милли эстафетасы һәм "Билге" квест-уены "Мизгел" Клубы планына кертелгән булган.

Форум татар халкының милли үзенчәлеген, мәдәниятен һәм гореф-гадәтләрен саклап калу, яшьләрнең игътибарын татар телен һәм кыйммәтләрен үстерүгә җәлеп итү өчен үткәрелә. Оештыручылар - Чаллы шәһәре Башкарма комитетының яшьләр эшләре буенча идарәсе, ТР Яшьләр эшләре буенча министрлыгы һәм  "Мизгел" милли мәдәният клубы белән "Нур" яшьләр үзәге тора.