Элвин Грей һәм Фирдус Тямаев төшкән фильмны каян карарга?

Яңалыкларда бер дә күренмәгән фильмны Татарстан киносы көннәрендә  күрсәткәннәр. Фильм - музыкаль комедия, "Әпипә" дип атала. Әлеге фильмда Зө-ләй-лә төркеме, Фирдүс Тямаев, Элвин Грей һәм Дилә Нигъмәтуллина кебек танылган җырчылар төшкән.

«Әпипә» - кинопродюсер Миләүшә Айтуганованың Татарстанда прокатка чыгару өчен төшерелгән кинопроекты. Киносценарийны Миләүшә Айтуганова заказы белән язучы Марат Кәбиров язган. Бу – язучының әлеге жанрда дебюты. Режиссер – Илшат Рәхимбай. Композитор һәм саунд-продюсер – Юрий Федоров (чыганак: Татар-информ).

Комедиянең сюжеты болайрак:  «Әпипә» музыкаль төркемендәге 7 кыз гастрольләрдә йөри. Әлмәттә алар концерт алдыннан паркта йөргәндә «Шайтан тәгәрмәче» аттракционында эленеп калалар. Шуңа күрә концертның икенче өлешенә генә килеп җитә алалар. Алар килгәнче, тамашачы алдында алып баручы, төркем җитәкчесе, тавыш операторы һәм костюмер чыгыш ясап өлгерә.

Фильмда «Фәридә-Алсу» дуэты һәм «Зө-ләй-лә» триосы кызлары, Алсу Әбелханова, Алинә Шәрипҗанова, Дилә Нигъмәтуллина һәм башкалар төшкән.

Мәхәббәт линиясе Тинчурин театрының яшь пары – Артем Пискунов белән Резеда Сәләховага тапшырылган. Артем - төркемгә очраклы эләккән егет, ә Резеда төркемнең костюмеры. Егеткә тормышчан киңәшләр бирүче автобус йөртүче ролендә – Фирдүс Тямаев. Тавыш операторы ролендә – Элвин Грей.

Фильмны, бәлки, ноябрь аенда республика районнары гастрольгә чыккач карап булыр. Миләүшә Айтуганова сүзләренә караганда, комедиянең бюджеты дәүләт исәбеннән булмаган, аны төшерергә Әлмәт районы хакимияте булышкан.