«Идел-йорт» һәвәскәр театр коллективлары бәйгесе җиңүчеләре билгеле

Шамил Закиров исемендәге «Идел-йорт» ХХII театр коллективлары регионара конкурсына гаризалар 2022 елның көзендә кабул ителә башлаган иде.

Бүген Г.Камал исемендәге Татар дәүләт Академия театрында Гран-при алган Мөслим районының халык театры коллективы “Зәңгәр шәл” спектаклен тәкъдим итте.

“Гран-при” бүләген Бөтендөнья татар конгрессы Башкарма комитеты җитәкчесе Данис Шакиров тапшырды. Ул кунакларны сәламләде һәм киләчәктә дә иҗади уңышлар теләде.

– «Идел-йорт» ХХII театр коллективлары бәйгесе тулы бер хәрәкәткә әйләнде. Ул үз актуальлеген югалтмыйча ХХII тапкыр үткәрелеп килә, илебезнең татар халык театрларын берләштерә, – дип ассызыклады ул.

Быел конкурста йөз театр коллективыннан ике меңнән артык кеше катнашты. «Идел-йорт – 2022» театр коллективлары бәйгесенең финалистлары үз спектальләрен В. И. Ленин мәдәният сараенда 4 800 дән артык тамашачыга күрсәтте.

1998 елдан башлап «Идел-йорт» конкурсы ел саен бөтен Татарстан Республикасыннан һәм Россия Федерациясе төбәкләреннән театр коллективларын җыя. Конкурсның төп максаты – үзешчән театр иҗатына ярдәм итү һәм аны үстерү, башкару осталыгын камилләштерү, үзешчән артистларның һәм куючы режиссерларның иҗади мөмкинлекләрен киңәйтү.

Чыганак: Бөтендөнья татар конгрессы