«іВолга» яшьләр форумы: белемнең яңа чыганаклары

2023 елның 21-29 июлендә Самара өлкәсенең Мастрюков күлләре территориясендә Идел буе федераль округының «іВолга» яшьләр форумы узачак.

Ел саен төбәк оештыру комитеты форумга бару өчен 14 яшьтән 35 яшькә кадәрге яшьләр вәкилләреннән торган Татарстан делегациясен төзи.

2023 елда форум программасының төп темасы «Вакыйгалар оештыру» булачак. Форум программасы 8 белем бирү сменасы һәм 3 махсус трек буенча узачак, дип хәбәр итә ТР Яшьләр эшләре министрлыгы.

Катнашучыларны сайланган смена буенча тренинг дәресләре, яшьләр проектлары конкурсы, фәнни һәм гамәли конференцияләр, мастер-класслар, төрле юнәлешләр буенча төбәк-ара югары уку йортлары арасында ачык ярышлар, түгәрәк өстәлләр, күргәзмәләр, фестивальләр, акцияләр, инициативалар ярминкәләре, турнирлар, федераль, округ һәм региональ дәрәҗәдәге экспертлар белән очрашулар, дискуссияләр, шулай ук мәдәни-ял итү, спорт һәм туристлык-туган якны өйрәнү программалары көтә.

Шул исәптән, үз хыялың проектын булдыру һәм аны тормышка ашыру өчен грант алу мөмкинлеге бар.

«іВолга-илһам һәм белемнең яңа чыганакларын бирә торган махсус атмосфера. Бу форум үз эшенең профессионаллары — спикерлар һәм төрле төбәкләрдән катнашучылар белән текә аралашу белән сугарылган. Көндез син кызыклы белем бирү программасын узасың, ә кичен мастер-класслар, тренинглар, концертлар кебек кызыклы чараларга йөрисең» — дип сөйләде 2022 елда форумга Татарстан делегациясендә катнашучы Нургөл Сансызбаева.