«Кадрлар резервы. Республика командасы» проектына катнашучылар җыю дәвам итә

Татарстанда яшьләр өчен каралган «Кадрлар резервы. Республика командасы» дип аталган иң эре мәгариф проектларының берсенә теркәлү 4 нче февральгә кадәр дәвам итә. Бүгенге көнгә Татарстанның 35 районыннан 1 меңнән артык гариза тапшырылган инде.

Сайлап алуның беренче дулкыны узган елның декабрендә узды. Катнашучылар компьютерда тест эшләде, ә аннары экспертлар белән төркемле әңгәмә узды.

Быел проектта катнашучылар республика иҗтимагый оешмаларының бер өлеше булачак һәм аларда киләчәк эш өчен гамәли юнәлешле күнекмәләр алачак. Яшьләр үз көчләрен «УРАМ» экстрим-паркында, Иҗади яшьләр академиясендә, ТР Яшьләр үзәгендә, ТР Иреклеләр мәгълүмат-ресурс үзәгендә һәм «Патриот» яшьләрне спорт-патриотик һәм армиягә кадәр әзерләү республика үзәгендә сынап караячак, дип хәбәр итә проектның матбугат хезмәте.

Быел уку юнәлешләре өч булачак: иреклеләр өлкәсендә менеджмент, патриотик проектларны үстерү, берләшмәләр белән эшләү. Катнашучылар проект менеджменты һәм мәгълүмати-агарту чараларын оештыру буенча база белемнәре алачаклар, команда белән идарә итәргә өйрәнәчәкләр, ә ел ахырына үз юнәлешләре буенча уңышлы проект булдырачаклар.

«Кадрлар резервы. Республика командасы» проектында катнашу өчен түбәндәге сылтама буенча гариза калдырырга мөмкин.

«Кадрлар резервы» 13 ел буе эшләп килә, бу дәвердә 210 кеше дәүләт органнарына эшкә алынган, 260 тан артыгы предприятиеләргә урнашкан. Моннан тыш, 2350 дән артык акция һәм чаралар гамәлгә ашырылган.

Чыганак: kzn.ru