Казанда «КышДаКар-фест»: Крафтлы шоколад, удмурт «пәрәмәчләре» һәм татар чәе

24-нче декабрьдән 13-нче гыйнварга кадәр Казанда «КышДаКар-фест» кышкы фестиваль узачак. Касә янындагы мәйданда бәйрәм сәүдә рәтләре оештырылачак, анда казанлылар һәм шәһәр кунаклары гадәти булмаган тәм-томнарны татып карый, милли кухняны бәяли, сувенирлар сатып ала һәм мастер-классларда катнаша алачак.

Сәүдә рәтләре яңа ел стилендә шәһәр символикасы һәм иллюминациясе белән бизәлгән сигез ноктадан торачак. Биредә яңа ел бүләкләре, кулдан эшләнгән сувенирлар, кайнар татар чәе һәм Европа глинтвейны сатылачак.

Фестивальдә танылган җәмәгать туклануы йортлары, сувенир продукция җитештерүчеләр, һөнәрчеләр, фермерлар һәм башкалар катнашачак. Фестивальгә башка төбәк вәкилләре дә киләчәк, мәсәлән, Удмуртиядән катнашучылар кунакларга пәрәмәчләр тәкъдим итәчәк.

Фестивальдә халык өчпочмак, өлеш, гөбәдия, чәк-чәк, кыстыбый кебек татар ризыкларын татып карый алачак.

Фастфуд яратучылар өчен ассортиментта фри, наггетсылар, бургерлар, баллы яратучылар өчен – попкорн, татлы мамык, имбирлы прәннекләр, шоколадтагы таякчыкта автор вафлилары, кайнар шоколад, крафтлы шоколад булачак. Шулай ук мәйданчыкта гаилә шоколад остаханәләре эшләячәк. Ит яратучылар кайнар юл белән ысланган «мәрмәр» түш ите, шашлыкның төрле төрләре, классик пицца, шаурмадан авыз итә алачак.

Фестиваль кунаклары ашарга гына түгел, ә ашарга әзерләү һәм эшләнмәләр ясау буенча мастер-классларга да кушыла алачак.

24-нче декабрьдә фестивальгә 16:00 сәгатьтән 22:00 сәгатькә кадәр, 25-нче һәм 26-нчы декабрьдә 10:00 сәгатьтән 22:00 сәгатькә кадәр, 27-30-нчы декабрьдә 16:00 сәгатьтән 22:00 сәгатькә кадәр килергә мөмкин булачак.

31-нче декабрьдә фестиваль мәйданчыгы 10:00 сәгатьтән эшли башлый һәм 1-нче гыйнвар көнне 3:00 сәгатьтә ябылачак.

1-9-нчы гыйнвар көннәрендә «КышДаКар-фест» 10:00 сәгатьтән 22:00 сәгатькә кадәр, 10-13-нче гыйнварда 16:00 сәгатьтән 22:00 сәгатькә кадәр үткәреләчәк, дип хәбәр иттеләр Туризмны үстерү комитетында.

Чыганак: kzn.ru