КОРОНАВИРУС: ИҢ КҮП ОЧРАК - КАЗАНДА

Татарстанда соңгы тәүлек эчендә тагын 25 кеше коронавирус йоктырган. Бу хакта республиканың сәламәтлек саклау министрлыгының матбугат хезмәте хәбәр итте.

Бер очрак читтән кертелгән, калганнары - элемтә юлы аша күчкән. Алты кешене хастаханәләргә салганнар, тагын 19ы өйләрендә дәвалана. Яңа пациентлар арасында сигез кеше — 60 яшьтән өлкәнрәк, тагын алтысы - 50дән 60 яшькә кадәр.

Зарарлану очракларының иң күбе Казанда — 14, өчесе Буа районында, икесе Кама Тамагы һәм Питрәч районнарында булган. Аксубай, Биектау, Лаеш һәм Лениногорск районнарында берәр яңа авыру теркәлгән.

Татарстанда 6 октябрьгә коронавирус белән зарарлануның 7 389 очрагы билгеле. Шул ук вакытта 6 298 кеше сәламәтләнгән. Шулай ук covid-19 белән 81 пациентның үлүе турында хәбәр ителде.