Лагерьда әйдаман булырга телисезме? Гариза җибәрегез!

Бу хакта шәһәр Башкарма комитетының Балалар һәм яшьләр эшләре комитетының матбугат хезмәтендә хәбәр иттеләр.

«Әгәр син безнең «Әйдаман уты» мәктәбен үтмәгән булсаң, әмма лагерьларда вожатый булып эшләү тәҗрибәң бар икән, балаларны яратасың, шат күңелле, ачык һәм Казан лагерьлары белән бергә җәйне матур иттереп үткәрергә әзер булсаң, димәк, тизрәк гариза калдырырга кирәк», – диелә белдерүдә.

Әйдаман булырга теләүчеләр гариза бирә ала. Анда контакт мәгълүматларын, туган көнен, эш тәҗрибәсен, лагерьны яки сменаны күрсәтергә һәм шәхси сыйфатлар турында язарга кирәк.

Моңа кадәр KZN.RU порталы җәйге сәламәтләндерү кампаниясе башлануы турында хәбәр иткән иде. Җәй көне 44 меңнән артык бала ял итәчәк. Барлыгы 175 лагерь эшләячәк: 146 мәктәп яны, ике палаткалы һәм 27 шәһәр читендәге сәламәтләндерү лагерьлары.

Чыганак: kzn.ru