Мәҗнүн: Рәдиф Гаташның шигырь киче

31 март көнне MOÑ театраль мәйданында шагыйрь Рәдиф Гаташның шигырь киче узачак. Шигырьләрен автор үзе укый. Кичнең махсус кунаклары — Зәйнәп Фәрхетдинова, Илүсә Хуҗина, Илгиз Мөхетдинов — Рәдиф Гаташ сүзләренә язылган җырларны башкаралар.

Мартның соңгы көннәрендә Рәдиф абыйга 82 яшь тула, ә шигърияте һаман да яшь, дәртле, хөр рухлы. Рәдиф Гаташ — әдәбиятка 60нчы елларның икенче яртысында килеп, башлангыч чорларында ак һәм ирекле шигырьгә өстенлек биргән шагыйрьләр буыныннан. Татар шигъриятенә яңа ритмнар керткән, шигырьне мәйданнарга чыгарган, сәхнәгә күтәргән буын да — алар.
⠀
Рәдиф Гаташ — әдәбиятыбызның мәҗнүне: давыллы хисләр, мәңгелек мәхәббәт җырчысы. Аның шигырьләрендә тормышны ярату, эчкерсез, кайнар дәрт ташып тора. Кайчандыр ул үз шигърияте турында болай язган булган: «Мине туктаусыз эзләнүче, дөньяга гашыйк яшь кеше образы мавыктыра. «Лирик сөйләшүләр»ем шул образга бәйләнешле буяулар инде».

Чыганак: MOÑ театраль мәйданы