Мендәр тышын ешрак алмаштырырга тырыш!

Яз ул мәхәббәт, матурлык кына түгел, ә без - кызларны борчыган бетчәләр дә әле... Бүген без биттәге бетчәләрдән котылу ысулы турында сөйләшербез.

Йоклаганда чәчтәге пычрак, баш тиресенең калдыклары битне бик нык пычрата һәм мендәр тышында җыела. Шуңа да атнага бер генә тапкыр булса да мендәр тышын алыштырырга онытма.  Иртән битеңне чистартмасаң, төнлә җыелган пычрак битеңә чыккан бетчәләрнең сәбәпчесе булачак. Куллар белән генә юыну тиешле нәтиҗә бирми икән, тирән чистарту өчен махсус щётка да алып куй. Ләкин ассортиментны яхшылап өйрән һәм нәкъ менә синең бит тиресенә килешә торган щётканы сайлап ал. Юганнан соң да битең майлы кебек тоелса, аны кабат юарга кирәкми. Югыйсә син битне саклаучы мөһим элементларны бетерәсең.

Бит тиресен үле күзәнәкләрдән дә чистартырга тырыш, пилинглар яса. Пилинг алдыннан битеңне йомшак итеп юарга кирәк. Ләкин шуны онытма: пилингларны еш ясарга ярамый (җәйге чорда ике атнага бер, кышкы чорда айга бер ясау да җитә).

Тулырак: Ялкын