Милли мәдәниятләр һәм гореф-гадәтләр елы чараларга бай булачак

Милли мәдәниятләр һәм традицияләр елында Татарстан Мәдәният министрлыгы муниципаль берәмлекләр арасында Мәдәният көннәрен үткәрү традицияләрен торгызу максатыннан конкурс игълан итә.  

Шулай ук, Мәдәният министрлыгы һәм «Татарстан Республикасы мәдәнияте өлкәсендә инновацияләрне гамәлгә кертү һәм традицияләрне саклау буенча ресурс үзәге» ДБУ берлектә этнофестивальләр картасын - Татарстан Республикасы халыкларының этномәдәни байлыгын булдырды. Бу картага 80гә якын фестиваль кертелде, дип хәбәр итә Татарстан Мәдәният министрлыгының рәсми сайты.

2023 елның 31 мартыннан 30 сентябренә кадәр Казан шәһәренең 13 төрле мәйданчыгында мәдәни программа әзерләнәчәк. Казан халкы һәм кунаклары тарихи-мәдәни күргәзмәләр, туристлык маршрутлары, милли ашлар, халык сәнгать һөнәрләре, иҗат коллективлары чыгышлары аша муниципаль берәмлекләрнең уникаль мәдәни коды белән танышачак.