Миллион татар

"Әдәби марафон" проекты кысаларында Раил Гатауллин яңа журнал чыгара башлаган. Тиражы 999 данә.

Укучыларның журналны алуларына төгәл ике атна да үткән икән. Баш мөхәррир үзенең уй-кичерешләре белән бүлешә:
- Шушы 2 атна дәвамында 30 дан артык кешедән шәхси хат буларак һәм Ватсаппка уңай бәяләмәләр, рәхмәтләр кабул иттем һәм кабул итүне дәвам итәм. Кемгәдер журналның марафончылар иҗатына багышланган өлеше, кемгәдер балаларның фикерләвен үстерү өлеше ошаган. Уннан артык кеше сканвордны чишеп җавапларны юллады (бүген нәтиҗәләр ясап җиңүчене билгелибез!) Кемнәрдер промокодлардагы балларны туплап ял итәргә барырга һәм Тинчурин театрына бонуслар/ташламалар алды. Кемнәрдер мотивацион мәкаләләрне укып тагын да рухланды һәм уңышка ирешү юлында беренче адымнарын атлый. Ә кемнәрдер шушы ике атна эчендә уңышка иреште дә инде. Нәкъ менә алардан рәхмәт хатлары кабул итүе күңелгә бал да май булып ята.

«Миллион татар» исемле әлеге яңа журнал кварталга бер тапкыр чыгачак. Раил Гатауллин искәртүенчә, ул үз алдына максат куярга һәм аңа ирешергә теләгән алдынгы карашлы татарлар өчен.