«Милләтебез хәзинәләре» балалар профильле сменасы ачыла

Татарстан Республикасы Яшьләр эшләре министрлыгы, Татар федераль милли-мәдәни автономиясе һәм «Идел» яшьләр үзәге 30 май - 16 июнь көннәрендә «Волга» Яшьләр үзәгендә «Милләтебез хәзинәләре» балалар профильле сменасын уздыра.

Сменаның максаты – Россия Федерациясе төбәкләрендә һәм чит илләрдә яшәүче татар балаларын берләштерү, аларда туган телгә, халкыбызның мәдәниятенә, тарихына, гореф-гадәтләренә мәхәббәт, хөрмәт тәрбияләү.

Бу елны сменага Татарстан, Башкортстан, Удмуртия Республикаларыннан, Пермь крае, Әстерхан, Владимир, Иваново, Киров, Түбән Новгород, Пенза, Самара, Оренбург, Новосибирск, Төмән, Ульяновск,  Рязань өлкәләреннән балалар килде.

Унсигез көн дәвамында балалар өчен татар теле дәресләре; тарих, вокал, бию, кул эшләре һәм журналистика буенча иҗади остаханәләр оештырылачак. Программада Казан шәһәренә экскурсия һәм театрга бару каралган. Һәр елны уздырылып килүче традицион «Идел кызы», «Идел егете», «Танцпол йолдызы», «Идел моңы» конкурслары, спорт ярышлары планлаштырылган. Оештырылачак чараларның һәрберсе балаларның сәләтләрен ачуга, аларда татар халкының милли яшәешенә, гореф-гадәтләренә мәхәббәт уятуга юнәлдерелгән.